Rita Ora po përballet me një betejë ligjore me ish-menaxheren e saj, Sarah Stennett, pas një mosmarrëveshjeje financiare që tashmë ka përfunduar në Gjykatën e Lartë në Londër.
Kompania e Stennett, FAE Ventures, ka ngritur padi ndaj këngëtares shqiptaro-britanike, duke pretenduar se ajo i detyrohet kompanisë të paktën 3.2 milionë paund.
Stennett ka qenë pjesë e ekipit që menaxhoi karrierën e Ritës që prej vitit 2009, ndërsa bashkëpunimi mes tyre përfundoi disa vite më vonë.
Sipas pretendimeve të kompanisë, gjatë periudhës së menaxhimit disa të ardhura nuk janë deklaruar ose llogaritur siç duhej, duke ndikuar në komisionet që FAE Ventures pretendon se i takonin.
Një prej pikave kryesore të padisë lidhet me rreth 1.7 milionë paund, shumë që FAE Ventures e konsideron të zbritur në mënyrë të pajustifikuar.
Në këtë kategori përfshihen shpenzime të ndryshme, mes tyre reklamat, shërbimet e kontabilitetit dhe sigurimet.
Në dokumentet e gjykatës përmendet gjithashtu “Phoenix World Tour”, turneu i Ritës që përfshiu shtatë koncerte në arena në Mbretërinë e Bashkuar, përfshirë performancën në O2 Arena në Londër.
Sipas kompanisë së ish-menaxheres, gjatë viteve 2019–2020 nuk janë raportuar të ardhura nga ky aktivitet në vlerën e mbi 1.1 milionë paundëve.
FAE Ventures pretendon gjithashtu se komisionet e saj nuk janë llogaritur mbi të gjitha të ardhurat e përfituara nga Rita Ora apo mbi të ardhurat e mbledhura në emër të saj.
Në dosjen gjyqësore ngrihen pikëpyetje edhe mbi deklarimet financiare të artistes. Sipas pretendimeve të kompanisë, mund të mos jenë pasqyruar të ardhura nga koncerte që arrijnë deri në 6 milionë paund.
Një tjetër pjesë e padisë lidhet me pjesëmarrjen e Ritës në “The Masked Singer”.
FAE Ventures pretendon se komisionet për sezonin e pestë janë llogaritur mbi fatura që, sipas kompanisë, nuk pasqyronin saktë shumën që këngëtarja duhej të merrte sipas marrëveshjes.
Sipas paditëses, kjo i ka shkaktuar një humbje prej rreth 25 mijë paundësh.
Për të mbështetur pretendimet e saj, FAE Ventures ka kërkuar qasje në dokumentacionin dhe të dhënat financiare të artistes.
Sipas dosjes, kompania Y Royalties ka audituar deklaratat financiare të Ritës për periudhën nga korriku 2018 deri në qershor 2024.
Pala paditëse pretendon se gjatë këtij procesi janë dorëzuar disa prej dokumenteve të kërkuara, por jo të gjitha.
Për momentin, çështja mbetet në proces gjyqësor dhe Rita Ora ende nuk ka paraqitur mbrojtjen e saj ndaj padisë.
Për këtë arsye, pretendimet e FAE Ventures janë pjesë e procesit gjyqësor dhe nuk përbëjnë një konstatim përfundimtar nga gjykata.
