Një debat që nisi brenda shtëpisë së Big Brother VIP Kosova 5 ka marrë përmasa të tjera jashtë saj. Këtë herë në qendër të vëmendjes është Arlinda Morina, ndaj së cilës Alba Pollozhani ka bërë akuza të forta përmes rrjeteve sociale.
Shkak është bërë një bisedë e Arlindës me banorët rreth realizimit të një filmi. Kjo temë ka rikthyer në vëmendje një projekt të mëparshëm, për të cilin Alba pretendon se nuk u përfundua ashtu siç ishte parashikuar.
Në disa postime në Instagram, Pollozhani iu drejtua Arlindës dhe Edonit Elshanit, duke pretenduar se ata kishin kërkuar realizimin e një materiali promovues, i cili fillimisht do të përdorej vetëm për të parë cilësinë e punës dhe jo për publikim.
“Na morët për të bërë teaser, për të parë njëherë punën, jo për ta publikuar”, ka shkruar Alba, duke pretenduar se pamjet janë ende të publikuara pa pëlqimin e personave që kanë marrë pjesë në realizimin e tyre.
Alba Pollozhani via Instagram Story
Ajo ngriti gjithashtu shqetësimin se imazhi i tyre po përdoret për të siguruar sponsorë për filmin, ndonëse, sipas saj, nuk është nënshkruar asnjë marrëveshje apo kontratë për pjesëmarrje në projekt.
“Kërkoni sponsorë me figurat tona pa aprovimin tonë për pjesëmarrje dhe pa nënshkrim kontrate”, thuhet në një tjetër reagim të saj.
Por fjalët e Albës u bënë edhe më të ashpra në vijim. Ajo përdori etiketime të rënda ndaj personave që përmendi, duke i quajtur “gjakpirës” dhe “mashtrues deluzionalë”, ndërsa i akuzoi se synojnë të përfitojnë financiarisht dhe të fitojnë famë përmes punës së të tjerëve.
Alba Pollozhani via Instagram Story
Pollozhani këmbëngul se pretendimet e saj mbështeten në dokumente dhe prova, duke shkruar: “I kam me fakte! Me dokumente!”
Alba Pollozhani via Instagram Story
Madje, ajo paralajmëroi edhe mundësinë e ndjekjes së rrugës ligjore për atë që e konsideron dëmtim të imazhit dhe mashtrim, duke e mbyllur reagimin me mesazhin: “Stop gjakpirësit! Asnjë falje!”
Duhet theksuar se këto janë pretendime të Alba Pollozhanit, të cilat nuk janë verifikuar në mënyrë të pavarur. Nga ana tjetër, Arlinda Morina ndodhet aktualisht brenda shtëpisë së BBVK-së dhe deri më tani nuk ka një reagim publik të konfirmuar prej saj lidhur me akuzat.
