Igli Tare, ish-futbollisti i Kombëtares shqiptare, është paraqitur herët në mëngjes në ambientet e SPAK, ku, sipas raportimeve, i është komunikuar akuza që rëndon ndaj tij.
Tare dyshohet për pastrim parash, në kuadër të hetimeve që lidhen me pronësinë dhe regjistrimin e dy vilave në bregdetin shqiptar, të cilat, sipas dyshimeve të hetimit, i atribuohen ish-zëvendëskryeministres Belinda Balluku.
Bëhet fjalë për dy prona, njëra në Dhërmi dhe tjetra në Palasë. Sipas dyshimeve të ngritura nga hetuesit, këto pasuri dyshohet se janë regjistruar në emër të ish-futbollistit, çka përbën një nga pistat që po shqyrtohen në kuadër të hetimit.
Komunikimi i akuzës ndaj Igli Tares vjen një ditë pasi SPAK i komunikoi akuzat edhe Belinda Ballukut. Ish-zëvendëskryeministrja është marrë e pandehur për pesë vepra penale, të dyshuara të kryera në 15 raste, sipas informacionit të publikuar.
Hetimet për çështjen vijojnë, ndërsa mbetet në dorë të organeve të drejtësisë të përcaktojnë përgjegjësinë penale të personave të përfshirë.
Deri në një vendim përfundimtar të gjykatës, dyshimet dhe akuzat ndaj personave të përmendur nuk përbëjnë prova të fajësisë së tyre.
