Protestat studentore në Tiranë pritet të marrin një tjetër zhvillim ditën e nesërme, pasi pedagogët kanë vendosur t’u bashkohen thirrjeve për solidaritet me studentët dhe të protestojnë kundër dhunës së raportuar gjatë ditëve të fundit.
Sindikata e Punonjësve të Universiteteve të Shqipërisë (SPUSH) ka njoftuar organizimin e një marshimi solidariteti, i cili do të zhvillohet të martën, më 20 tetor, në orën 10:00, përpara Universitetit Politeknik të Tiranës.
Mottoja e marshimit do të jetë “STOP DHUNËS NDAJ STUDENTËVE”, ndërsa qëllimi është të shprehet mbështetje për të rinjtë dhe të kërkohet mbrojtja e të drejtave të tyre.
Në deklaratën e publikuar, sindikata thekson se ka qenë në mbështetje të protestës studentore që prej fillimit, ndërsa shpreh shqetësimin për mënyrën se si policia ka ndërhyrë ndaj protestuesve.
SPUSH e konsideron pjesëmarrjen në marshim një detyrim qytetar dhe njerëzor, duke kërkuar gjithashtu krijimin e kushteve për dialog.
Thirrjes për pjesëmarrje i është bashkuar edhe Dea Mishel, e cila ka shpërndarë njoftimin dhe u ka bërë apel prindërve dhe qytetarëve që të jenë të pranishëm, pavarësisht bindjeve politike.
“Nuk duhet të jesh pedagog apo student për të qenë aty. Mjafton të besosh se fëmijët tanë meritojnë dinjitet, siguri dhe të drejtën për t’u shprehur. Studentët janë fëmijët tanë. Heshtja nuk është zgjidhje!”, thuhet në mesazhin e shpërndarë.
Organizatorët kanë theksuar se nuk mbështesin dhunën, por synojnë të shprehin solidaritet me studentët dhe të kërkojnë siguri e respekt për të drejtën e tyre për t'u shprehur.
Marshimi do të zhvillohet nesër, në orën 10:00, përpara Universitetit Politeknik të Tiranës. Mbetet për t'u parë sa pedagogë, studentë dhe qytetarë do t'i përgjigjen kësaj thirrjeje.
