Dhomat e Specializuara të Kosovës në Hagë kanë marrë një vendim të ri për vizitat ndaj Hashim Thaçit, duke hequr pjesërisht kufizimet që ishin vendosur më herët për vizitat jo të privilegjuara.
Sipas vendimit të datës 21 shtator, vizitat e disa personave tashmë lejohen sërish, por ato do të zhvillohen nën mbikëqyrje aktive. Ndërkohë, ndalimi i vizitave vazhdon të jetë në fuqi për katër persona.
Vendimi lidhet me çështjen e veçantë ndaj Thaçit për vepra kundër administrimit të drejtësisë, në të cilën Prokuroria ka pretenduar se gjatë vizitave jo të privilegjuara në paraburgim janë përcjellë informacione konfidenciale lidhur me dëshmitarët dhe janë dhënë udhëzime për dëshmitë e tyre.
Në kuadër të rishikimit të kufizimeve, gjykatësi ka vlerësuar se, duke marrë parasysh fazën aktuale të procesit gjyqësor, rreziku i ndikimit te dëshmitarët është zvogëluar ndjeshëm, madje mund të jetë eliminuar. Megjithatë, për katër persona gjykata ka konsideruar se ndalimi mbetet i nevojshëm dhe proporcional për ruajtjen e integritetit të procesit.
Mes personave për të cilët është hequr ndalimi i vizitave janë Milaim Ahmetaj, Milaim Cakiqi dhe Avni Kastrati, ndërsa emrat e tre personave të tjerë janë të redaktuar në versionin publik të vendimit.
Nga ana tjetër, Artan Behrami, Blerim Shala, Ismail Syla dhe Vllaznim Kryeziu mbeten subjekt i kufizimit dhe vizitat e tyre jo të privilegjuara me Thaçin nuk lejohen.
Gjatë vizitave që tashmë lejohen, autoritetet do të monitorojnë komunikimin dhe do të raportojnë çdo përpjekje për të përcjellë informacione konfidenciale, udhëzime lidhur me dëshmitarët apo për të shkelur rregullat e objektit të paraburgimit.
Kufizimet do të rishikohen përsëri në dhjetor 2026, sipas Dhomave të Specializuara.
Vendimi vjen pasi në çështjen për administrimin e drejtësisë deklaratat përmbyllëse u përfunduan më 14 shtator 2026, ndërsa tashmë pritet vendimi i gjykatës në këtë proces.
Ndërkohë, kjo çështje është e ndarë nga gjykimi kryesor ndaj Thaçit dhe bashkëakuzuarve të tij: më 16 shtator 2026, Dhomat e Specializuara shpallën aktgjykimin në çështjen kryesore dhe Thaçi u dënua me 25 vjet burgim, me kreditimin e kohës së kaluar në paraburgim.
