Një bashkëbisedim i pazakontë në rrjetet sociale është bërë viral në orët e fundit, ku në qendër të vëmendjes është një i ri nga Kosova dhe vetë NASA.
Gjithçka nisi pas publikimit të disa pamjeve mbresëlënëse nga misioni Artemis II, ku shfaqej ana e pasme e Hënës me Tokën në sfond. Megjithatë, jo të gjithë përdoruesit u bindën për autenticitetin e këtyre imazheve.
Mes shumë komenteve, u veçua ai i Nexhi Krasniqi, i cili ngriti dyshime për mungesën e yjeve në foto, duke sugjeruar se ato mund të ishin krijuar nga inteligjenca artificiale.
Ky koment mori një përgjigje të drejtpërdrejtë nga NASA, e cila sqaroi arsyen shkencore pas këtij fenomeni. Sipas agjencisë, yjet nuk duken në këto imazhe sepse janë shumë më të zbehtë krahasuar me ndriçimin e fortë të Hënës, e cila reflekton shumë më tepër dritë. Për më tepër, kamerat kanë kufizime në kapjen e kontrastit mes elementeve shumë të ndritshme dhe atyre shumë të errëta.
Ky ndërveprim i rrallë mes një përdoruesi shqiptar dhe një prej institucioneve më të mëdha hapësinore në botë është shpërndarë me shpejtësi, duke u kthyer në një nga momentet më të komentuara dhe virale në rrjet.
