Një situatë e papritur dhe me nota humori ka ndodhur brenda shtëpisë së “Ferma VIP”, ku në qendër të vëmendjes janë bërë shkrimtarja Mimoza Ahmeti dhe balerini Ilir Shaqiri.
Ngjarja ka ndodhur gjatë një loje spontane mes banorëve, ku Iliri ishte përpjekur me çdo mënyrë ta bënte Mozën të qeshte, duke i qëndruar pranë dhe duke bërë mimika humoristike.
Në një moment të papritur, situata ka marrë një kthesë të pazakontë. Moza ka ndërhyrë me një fjali enigmatike: “A të bëj një gjë të frikshme?”, përpara se ta kapte Ilirin nga fytyra dhe ta puthte në buzë.
Veprimi i saj ka ardhur si surprizë për balerinin, i cili fillimisht është shtangur, por më pas ka shpërthyer në të qeshura, duke e kthyer momentin në një situatë argëtuese për gjithë banorët e tjerë që ndodheshin në dhomë.
Atmosfera në shtëpi është mbushur me të qeshura, ndërsa fermerët e kanë parë ngjarjen si pjesë të lojës dhe natyrës spontane të dinamikave brenda formatit.
Momenti ka ngjallur reagime edhe jashtë shtëpisë, duke u kthyer menjëherë në një nga skenat më të komentuara të spektaklit.
