Albërije Hadërgjonaj ka folur sërish për raportin e saj me Ardit Gjebrean, duke zbuluar arsyen që, sipas saj, çoi në prishjen e marrëdhënies mes tyre.
E ftuar në emisionin “Live From Tirana”, këngëtarja u ndal te një nga episodet më të komentuara të karrierës së saj, që lidhet me pjesëmarrjen në “Kënga Magjike”. Sipas saj, gjithçka nisi pasi kënga e saj nuk arriti të kualifikohej në finale, një rezultat që, siç thotë ajo, habiti shumë njerëz.
“U çuditën të gjithë njerëzit kur kënga ime nuk hyri në finale. E kam thënë edhe te ‘Kënga Magjike’, Arditit i ka ngelur hatri, patëm një përplasje”, u shpreh Albërija.
Artistja theksoi se suksesin e saj nuk ia atribuon askujt tjetër përveç talentit dhe punës së bërë ndër vite, duke nënvizuar se nuk ka nevojë për miratimin e askujt për t’u konsideruar artiste.
“Mua nuk më bën artiste as Ardit Gjebrea dhe asnjë njeri në botë. Mua më ka dhënë Zoti një talent dhe kam punuar fort. Unë nuk jam servile, mua nuk më bëhet vonë për askënd në botë. Unë jam Albërije Hadërgjonaj dhe kërkoj drejtësi”, deklaroi këngëtarja.
Me këtë deklaratë, Albërije Hadërgjonaj riktheu në vëmendje një nga debatet më të përfolura të viteve të fundit, duke theksuar se vazhdon të qëndrojë pas bindjeve të saj dhe se e konsideron drejtësinë, talentin dhe punën si bazën e suksesit në karrierën artistike.
