Tenori Armaldo Kllogjeri, i njohur për publikun si Maestro nga edicioni i dytë i “Big Brother VIP Albania”, ka bërë një deklaratë të fortë në rrjetet sociale, duke rikthyer në vëmendje përvojën e tij në televizion. Fjalët e tij kanë ngjallur diskutime, ndërsa ndjekësit po përpiqen të kuptojnë se kujt i drejtohet ish-banori.
Përmes një postimi të gjatë në Instagram, Maestro ka zbuluar se kishte marrë një ftesë për t’u bërë pjesë e një spektakli televiziv mbrëmjen e së premtes. Megjithatë, nga mënyra se si është shprehur, duket se kjo ftesë i ka rikthyer kujtime jo fort të këndshme nga e kaluara.
“Unë e bëra dikur show-n tim në atë ekran me shpirt, me pastërti, me dëshirën për të krijuar situata që publiku të argëtohej”, shkruan ai, duke lënë të kuptohet se përkushtimi i tij nuk është vlerësuar siç duhej.
Tenori ka vijuar me kritikat, duke pretenduar se largimi i tij nga loja ishte i padrejtë dhe se pasojat e asaj përvoje vazhdojnë ta shoqërojnë edhe sot.
“U nxorra nga loja në mënyrën më të ulët dhe u hodha në rrugë si një ‘limon i shtrydhur’”, shprehet Maestro.
Armaldo Kllogjeri via Instagram Story
Edhe pse nuk ka përmendur emra konkretë, koha e publikimit të deklaratës ka ngritur dyshime se ajo mund të lidhet me “Live me Luizin”, emisionin e ri të Luiz Ejllit në Top Channel, i cili transmetohet të premteve.
Kjo hipotezë rikthen në vëmendje edhe marrëdhënien e ndërlikuar mes dy ish-banorëve të “Big Brother VIP Albania 2”.
Fillimisht, Luiz Ejlli dhe Maestro krijuan një raport të afërt brenda shtëpisë, por miqësia e tyre u shndërrua më pas në rivalitet. Pas eliminimit, Armaldo nuk pranoi t’i jepte dorën Luizit, pasi e konsideroi mënyrën se si ishte dërguar në nominim si një tradhti.
Përplasjet mes tyre vijuan edhe jashtë reality show-t. Në tetor të vitit 2023, gjatë provave të “Dancing With the Stars”, Maestro reagoi ashpër kur iu përmend emri i Luizit, duke deklaruar se nuk komunikonte me të.
Megjithatë, nuk është konfirmuar se deklarata e fundit i drejtohet Luizit. Vetë Maestro nuk ka përmendur as emrin e tij dhe as projektin televiziv për të cilin ka folur.
Ndërkohë, disa ndjekës kanë vënë në pikëpyetje pretendimin e tenorit se nuk është vlerësuar sa duhet nga televizioni, duke kujtuar angazhimet e tij pas përfundimit të “Big Brother VIP Albania”.
Pas daljes nga shtëpia, Armaldo mori pjesë në “Dancing With the Stars” dhe më vonë iu besua edhe moderimi i një rubrike muzikore në emisionin “E Diell”.
Në fund të reagimit të tij, Maestro ka theksuar se sot i jep përparësi respektit për veten dhe se, duke parë situatën aktuale në Shqipëri, nuk ndihet në gjendjen e duhur për të bërë spektakël.
Por kujt i drejtohet në të vërtetë Maestro? Për momentin, mbetet e paqartë nëse ftesa lidhet me emisionin e Luiz Ejllit apo me një tjetër projekt televiziv. Pa një sqarim nga vetë tenori, çdo lidhje me Luizin mbetet në nivelin e aludimeve.
