Dua Lipa ka fshirë nga profili i saj në Instagram fotografitë e publikuara më herët nga Kepi i Merlit, destinacion që këngëtarja e kishte cilësuar dikur si një nga vendet e saj të preferuara. Megjithëse postimet nuk janë më të dukshme në profilin e saj, ato vazhdojnë të qarkullojnë në media dhe në llogaritë e anëtarëve të familjes.
Ky veprim ka ngjallur diskutime në rrjet, pasi vjen në një kohë kur debati për ndërtimet në zonat e mbrojtura në Shqipëri është rikthyer në qendër të vëmendjes.
Së fundmi, Dua Lipa ishte e ftuar në podcast-in e Lea Ypit, ku u diskutua edhe për protestat kundër ndërtimeve në zonat e mbrojtura. Megjithatë, nuk ka asnjë konfirmim se fshirja e fotografive lidhet me këtë debat apo me zhvillimet e fundit.
Në rrjet kanë lindur aludime të ndryshme, pasi Kepi i Merlit është përmendur shpesh në diskutimet mbi zhvillimin e bregdetit shqiptar. Megjithatë, deri më tani, Dua Lipa nuk ka bërë asnjë deklaratë publike për arsyet e heqjes së fotove nga profili i saj.
Për rrjedhojë, çdo pretendim se këngëtarja i ka fshirë fotografitë për shkak të protestave apo debatit publik mbetet spekulim, pasi nuk mbështetet nga ndonjë deklaratë ose konfirmim zyrtar nga artistja apo përfaqësuesit e saj.
