Aktori i humorit Jul Deda ka bërë një rrëfim të papritur për përfundimin e bashkëpunimit me Top Channel, ku drejtonte emisionin investigativ “Fiks Fare”. Për herë të parë, ai ka treguar se si e mori vesh lajmin për largimin nga televizioni dhe ka zbuluar se ende nuk ka një përgjigje të qartë për arsyen e këtij vendimi.
I ftuar në emisionin “Andale”, Deda u pyet për atë që kishte ndodhur mes tij dhe televizionit. Përgjigjja e aktorit ishte e drejtpërdrejtë, duke lënë të kuptohet se situata mbetet ende e paqartë edhe për të.
“Do të drejtën fare, të mos t’i biem anash? Unë akoma s’e di me kë s’jam marrë vesh”, u shpreh ai.
Gjatë bisedës, moderatorët e pyetën nëse vendimi për largimin e tij ishte marrë nga Ledion Liço apo Lori Hoxha.
Por Jul Deda dha një përgjigje që tërhoqi vëmendjen, duke lënë të kuptohet se vendimi ishte marrë në një nivel edhe më të lartë drejtues.
“Jo, jo, më lart, patjetër”, deklaroi aktori, pa përmendur emra konkretë.
Megjithatë, pjesa më surprizuese e rrëfimit lidhej me mënyrën se si ai kishte mësuar për përfundimin e angazhimit në emision. Sipas Dedës, lajmin nuk e kishte marrë fillimisht nga drejtuesit e televizionit, por nga publikimet në media.
“Akoma s’e di me kë s’jam marrë vesh dhe akoma s’e di arsyen. E mora vesh nga portalet. Pas portaleve, pata një telefonatë nga drejtuesit”, tregoi ai.
Pra, sipas versionit të aktorit, telefonata nga drejtuesit e Top Channel erdhi vetëm pasi lajmi për largimin e tij ishte bërë publik.
Deklaratat e Jul Dedës kanë rikthyer vëmendjen te prapaskenat e largimit të tij nga “Fiks Fare”. Ndërsa aktori ka treguar hapur pakënaqësinë për mënyrën se si u informua, arsyeja konkrete e ndërprerjes së bashkëpunimit mbetet ende e pazbardhur, të paktën sipas rrëfimit të tij.
