Këngëtarja Rozana Radi ka zbuluar për herë të parë prapaskenat e debatit të shumëpërfolur me Rezarta Shkurtën, duke sqaruar arsyen pse u tërhoq papritur nga publikimi i një projekti muzikor.
E ftuar në emisionin “Goca dhe Gra”, Rozana rrëfeu se gjithçka nisi në muajin janar, kur iu propozua një këngë nga DJ Iliano. Por situata mori tjetër drejtim kur artistja zbuloi se materiali muzikor kishte lidhje me një projekt të mëparshëm të Rezarta Shkurtës, e cila dispononte versionin origjinal të këngës.
Sipas Rozanës, përpara se të pranonte bashkëpunimin, ajo kishte kërkuar garanci të plota lidhur me të drejtat e autorësisë dhe dokumentacionin ligjor të projektit. Artistja tha se ishte siguruar se çdo procedurë ishte kryer sipas ligjit, ndaj vendosi të vazhdonte me realizimin e një versioni remix të këngës.
Madje, projekti u performua live më 14 shkurt në qendër të Tiranës dhe u prit shumë mirë nga publiku, ndërsa po përgatitej edhe videoklipi zyrtar.
Por në momentet finale, Rozana u përball me një zbulim të papritur: kënga rezultonte të ishte shitur dy herë nga kompozitori, duke krijuar konflikt mbi të drejtat e përdorimit.
Për të shmangur problemet ligjore dhe për të ruajtur standardet profesionale, këngëtarja vendosi të tërhiqej menjëherë nga projekti.
“M’u tha se gjithçka ishte në rregull dhe ligjërisht e përfunduar. Duke qenë se Rezarta kishte versionin origjinal, ne realizuam një version remix,” – u shpreh Rozana Radi.
Deklarata e saj ka rikthyer menjëherë vëmendjen mbi raportin me Rezarta Shkurtën dhe debatet që kanë qarkulluar prej kohësh në media dhe rrjete sociale.
