Sezoni i ri televiziv pritet të sjellë një ndryshim të madh në “Portokalli”, teksa një emër i njohur i humorit shqiptar thuhet se është pranë rikthimit në drejtimin e spektaklit të Top Channel.
Bëhet fjalë për Agron Llakajn, një prej figurave më të spikatura të humorit shqiptar dhe një emër që është i lidhur ngushtë me historinë e “Portokalli”.
Sipas informacioneve të siguruara nga “Loki Magazine”, pas plot 16 vitesh nga largimi, Llakaj pritet të rikthehet në sezonin e ri të programit, këtë herë me një rol të rëndësishëm në drejtimin e spektaklit.
Rikthimi i tij do të ishte padyshim një nga surprizat më të mëdha të sezonit, pasi Agron Llakaj ka qenë për vite me radhë një prej figurave kryesore të “Portokalli”, si në moderim, ashtu edhe përmes personazheve të shumta humoristike që ka sjellë në skenë.
Por një pikëpyetje e madhe mbetet ende: Salsano Rrapi.
Prej vitesh, drejtimi i “Portokalli” i është besuar Salsanos, ndaj ende nuk dihet nëse ai do të vijojë të jetë pjesë e moderimit dhe spektakli do të drejtohet në bashkëpunim me Agron Llakajn, apo në sezonin e ri do të aplikohet një formulë krejtësisht e re.
Deri në prezantimin zyrtar të sezonit të ri, detajet mbeten për t’u konfirmuar.
Megjithatë, nëse rikthimi realizohet, Agron Llakaj në “Portokalli” pas 16 vitesh pritet të jetë një nga zhvillimet më të bujshme të sezonit të ri televiziv.
