Modelja shqiptare Angela Martini ka zbuluar se ka qenë viktimë e një grabitjeje në banesën e saj në Los Angeles, duke ndarë me ndjekësit detaje dhe pamje nga kamerat e sigurisë.
Përmes disa postimeve në Instagram, Martini tregoi se autorët hynë në shtëpinë e saj dhe i vodhën disa çanta. Ajo publikoi edhe video nga kamerat e sigurisë, ku shihen persona të maskuar duke lëvizur brenda dhe jashtë pronës.
“Unë, 24 orë pasi shtëpia ime në Los Angeles u grabit dhe çantat m’u vodhën,” shkroi modelja në një nga postimet e saj.
Angela Martini via Instagram Story
Në një tjetër reagim, Angela ndau një mesazh ku shprehu shqetësimin për situatën e sigurisë në zonën ku jeton.
“Kriminaliteti përhapet kur komunitetet ndalojnë së kushtuari vëmendje,” shkroi ajo.
Modelja publikoi gjithashtu një imazh të një personi të maskuar, i cili dyshohet se është një nga autorët e grabitjes, duke e shoqëruar me fjalët:
“Pas çdo maske fshihet djali i dikujt. Gjashtë ditë më vonë, e njëjta lagje. Një tjetër grabitje.”
Angela Martini via Instagram Story
Deri në këtë moment, Angela Martini nuk ka bërë të ditur vlerën e sendeve të vjedhura dhe as nuk ka konfirmuar nëse autorët janë identifikuar apo arrestuar nga policia. Ngjarja ka ngjallur reagime të shumta në rrjetet sociale, ku ndjekësit i kanë shprehur mbështetje modeles pas incidentit.
